Mawlod

089-Tausug-Kasilasa-300x225

By Abden Abdurrahim

انَّ الْحَمْدَ لِلَّهِ نَحْمَدُهُ وَنَسْتَعِينُهُ ونَسْتَغْفِرُهُ وَ نَعُوذُ بِاللهِ مِنْ شُرُورِ اَنْفُسِنَا وَ مِنْ سَيِئَاتِ اَعْمَالِنَا مَنْ يَهْدِهِ اللهُ فَلاَ مُضِلَّ لَهُ وَ مَنْ يَضْلِلْ فَلاَ هَادِي لَهُ وَأَشْهَدُ أَنَّ لاَ إلَه إلاَّ الله وَحْدَهُ لاَ شَرِيكَ لَهُ،وَأَشْهَدُ أَنَّ مُحَمَّداً عَبْدُهُ وَرَسُولُهُ صَلَّى الله عَلَيْهِ وَ عَلَى اَلِهِ وَأَصْحَابِهِ وَ مِنْ تَبِعَهُمْ بِإِحْسَانِ إِلَى يَوْمِ الدِّينِ وَسَلَّمَ تَسْلِيمَا كَثِيرا

Assalamulaykom wa rahmatullahi wa barakatuho mahuli mga Ummat Islam yari kami simulat pangadjian tungod pagmawlod ha Nabi Mohammad sallallaho alayhi wa sallam ha supaya tumarrang in maksud iban hukuman niya in mawlid atawa mawlod bahasa Arab in ma`na niya kapagbata atawa kapag-anak sumagawa kiyabiyaksahan na sin kamaasan taniyo ha hula iban nahinang nila na bahasa, adapon bang masabbot in kalima mawlod matayma sin kitaniyo katan in ma`na niya amuna in kapagbata ha Nabi Mohammad sallallaho alayhi wa sallam.

Piyagbata in Nabi Mohamad adlaw isnin ha dum sin hika hangpu tagduwa kasubangan sin bulan rabiyul awal sin tahon gadja ha hula Makkah,daing ha parsababan ini nabilang na a^dat sin kamatauran Ummat Islam ha katilingkal a^lam in magsa`bo ha kapagbata sin Nabi Mohammad sallallaho alayhi wa sallam bilang pagtunay nila sin sa laggo-laggo pagsukor ha ne`mat iban rahmat piyaratong kanila sin Allaho subhanaho wa taala iban bilang pagpamahalayak nila sin kasilasa pa Rasulullah sallallaho alayhi wa sallam, sumagawa di hikalibon in pagmungkil sin kaibanan manusiya ha pagmawlod lapay na in tibayhuan kakahinang ha lawman niya, sambil giyulal nila in pagmawlod sin inda jinis gugulalan bukon marayaw iban di tumop hadarat sin Rasulullah sallallaho alayhi wa sallam sarta tiyuna nila in pagmawlod hinang munkar iban bidaa iban nakasulang ha sara` sin Allahotaala iban nakaguwa daing ha likusan sin agama Islam, sampay mataud daing kanila nagbaktol kitab ha tungod mawlod damikkiyan giyulal sin kaibanan nila in pagmawlod ha Nabi Mohamamd bidaa dalala.

Muramurahan bang in kiya awnan nila wala naka-ingat sin kasabunnalan hi panghinduwaa taniyo pa Allahotaala in tunyukan sila pa kasabunnalan, adapon in Ummat Islam ha dalam sin ibuhan tahon na in nakalabay masi-masi in pagsa`abo nila sin mawlod annabiy ampa in Ummat Islam di magtibook ha kalaungan biya na sin kiyabayta sin Rasulullah sallallaho alayhi wa sallam لا تجتمع أمتي على الضلالة di magtibook in ummat ko ha kalaungan, sarta hiyaros sin ka ulamaan iban ka imaman dakula in pagsa`bo ha mawlod sin Rasulullah mayta siya subay mungkilon sin kaibanan, in maka ajaib daindi in kaibanan nagmungkil sin pagsa`bo ha mawlod sin Rasulullah awn daing kanila nagsa`bo sin tahon ba`go atawa adlaw kapagbata ha anak nila atawa adlaw kawapat ha maas nila atawa adlaw kapagbangon sin iskul nila atawa adlaw kapagsultan atawa adlaw kapagkawasa atawa adlaw kapagmahaldika sin hula iban na kaibanan niya, in pangasubo daindi mayta nila wala miyungkil in mga hinang ini iban wala nila giyulal bidaa

Adapon mataud naghilalaungan manusiya daing sin naka-una iban naka-huli ha tungod karayawan iban kalabbiyan sin Rasulullah daing ha kapagbata kaniya sampay kapagwapat kaniya ha tibayhuan mataud iban dahan masawa,awn daing kanila naghilalaungan labay daing ha tarasul awn daing kanila nagsalassay ha li-uran iban pagburos iban pagbata kaniya lapay na in katan jimato maka-ajaib ha lawman niya iban sin mga bukti nanunjuki pa karayawan iban kalabbiyan niya,amon pag-iyanon wayroon hangsulag daing ha bangsa manusiya buat malaingkan makaingat siya ha pagbata sin Rasulullah sallallaho alayhi wa sallam,iban mayta di sin nagparman in Allahotaala ha kalabbiyan niya أَلَمْ يَجِدْكَ يَتِيمًا فَآَوَى bukon ka kiyasakupan kaw ya Mohammad sin Tuhan mo yatim piyanjarihan niya kaw nagpusba kaymo, adapon in pagka-ilo sin Rasulullah simarta kaniya ha rahim pa siya sin inah niya.

Subhanallah talia in pagparihala kaniya sin Allahotaala bukon siya hat eipon sadja sumagawa piyapanjari siya sin Allahotaala bilang suntuan sa taas-taas sin katan eipon,awn daing kanila naghilalaungan ha tungod pagtarbiyat kaniya iban pagpusba kaniya iban paglasag niya simarta ha hidayat iban tawpik sin Allahotaala sampay nabilang siya suntuan sa taas-taas ha antara sin mga pardunganan niya ha pangummulan iban ha panganakan sampay nagulal siya mahatol kapangandulan (assadik al-amin),awn daing kanila naghilalaungan sin kalappas niya ha panandas jimato ha kabuhi niya iban pagparihala sin Allahotaala kaniya ha katan kahalan niya daing na mayan ha pakaradjaan agama mabot pa pakaradjaan donya,amon kiyasaksian sin bangsa manusiya sampay nabilang siya suntuan sa taas-taas ha tawkasi niya iban ha pamunpon niya iban ha pagsaumbibi niya pa bangsa manusiya,awn daing kanila naghilalaungan ha pagtagna sin wahiy kaniya iban kasalamat niya ha ini sarta na in mga liyanggal niya kasigpitan iban kahunitan sampay nasampurna in wahiy amon wayroon napahil daing kaniya hangsulag pakaradjaan,ha parsababan sin wahiy tumampal kato taniyo in panayma ha ginhawa mulliya sin Rasulullah sallallaho alayhi wa sallam di makaguwa daing ha duwa kahalan,kahalan mahanusiya (bashariya) iban kahalan nyawa (ruhaniya),adapon in pagkamanusiya sin Rasulullah sallallaho alayhi wa sallam amon nabilang wajib suntuan sin manusiya in kamulliyahan sin pangaddatan niya biya sin luman iban pangandul iban maap iban na sin katan diyaakan sin Allahotaalah pa upihan kato taniyo hadarat sin Rasulullah sallallaho alayhi wa sallam daing ha qaul iban piel iban katan kajarianan manusiya amon nangdahi pa kasampurnaan sin martabat niya sampay siya nabilang suntuan saryaw-rayaw iban suntuan sa taas-taas sin manusiya maabot dumatong in adlaw qiyamat pamunnakon ha parman sin Allahotaala قَدْ كَانَ لَكُمْ فِي رَسُولِ اللَّهِ أُسْوَةٌ حَسَنَةٌ لِّمَن كَانَ يَرْجُو اللَّهَ وَالْيَوْمَ الْآخِرَ وَذَكَرَ اللَّهَ كَثِيراً tanto nabilang kaniyo in suntuan ha Rasulullah suntuan marayaw kan siyo-siyo in ka awnan niya nagmuhot ha Allahotaala iban ha adlaw ahirat iban nagjikir mataud pa Allahotaala.

Adapon in nyawalihan niya di masarupa daing hadarat sin Rasulullah sallallaho alayhi wa sallam sin hangsulag manusiya in siya biya sin pagkabiyaksahan manusiya daing ha katan tibayhuan labi awla apabila niya kaingatan in katan sin jimato ha Rasulullah sallallaho alayhi wa sallam daing na mayan ha pagpasampay niya sin wahiy iban katan sin sipat niya tartanto kaniya amon in kaibanan niya manunjuki ha pagpapanjari kaniya mulliya sarta nakadugaing daing ha pagpapanjari sin manusiya,biya na sin makawa taniyo pangadjian in pagturon sin wahiy kaniya ha kahalan amon wayroon kiyalabayan sin hangsulag kanabihan iban karasulan mapuas daing kaniya,sarta in pagmisla atawa pagsud sin malaikat mulliya pa lawm sin jasad niya mulliya iban di sumud in sahaya buat malaingkan pa lawm sin sahaya,ha kahalan yadto in Nabi Mohammad sallallaho alayhi wa sallam bukon siya biya sin pagkabiyaksahan manusiya daing ha katan tibayhuan,hoon in siya manusiya sumagawa bukon biya sin pagkabiyaksahan manusiya,biya na sin sambat in Nabi Mohammad suntuan sa taas-taas ha pagkamanusiya niya labi awla in siya suntaun sa taas-taas ha pagkanyawa niya karna nagparman in Allahotaala nanunjuki kaniya وَإِنَّكَ لَعَلَى خُلُقٍ عَظِيمٍ iban tanto in ikaw ya Mohammad ha pangaddatan dakula,ampa way makaingat ha kiya awnan sin kalagguan pangaddatan nasabbot buat malaingkan tupot in nagpapanjari kaniya

Apabila sadja kiyananaman sin mga nagmungkil ha pagmawlod tanto kaingatan nila in pangho sin katan piyapanjari awn hak niya kato taniyo magkugkuyag kaniya ha tiyap-tiyap hangkasasaat iban magsarangsukol pa Allaho subhanaho wa taala daing ha kalabbiyan niya hiyanoghara niya kato taniyo in Nabi Mohammad sallallaho alayhi wa sallam sarta piyanjari niya Rasul ha biya sin ginhawa taniyo manusiya,nagbatsa kato taniyo sin ayat niya iban naghindo kato taniyo sin hikmat niya iban nagsutsi kato taniyo hadarat niya iban naghidayat kato taniyo labay daing ha ijin niya iban nagpasahaya kato taniyo sin sahaya niya tudjo pa daan mabuntol,bukon uno bang uno in pagsa`bo sin Ummat Islam ha mawlod sin Rasulullah buat malaingkan magtipon sila ha pagjikilan pa Allahotaala amon sunnat in hukuman niya ha sara` iban pagbatsa sin Qur`an mahamulliya iban pagsalawat ha Nabi mulliya iban pagkissa ha salsila niya iban paghati ha mga kalabbiyan niya marayaw iban pangaddatan niya sampurna in mahuli panghinduwaa pa mga Ummat Muslimen,in pangasubo ha uno in munkar iban ha uno in bidaa ha mga nasabbot yadto

Ha tungod sin hilalaungan sin mga nagkabtangan in pagmawlod wala jimato ha masa sin Rasulullah sallallaho alayhi wa sallam atawa ha masa sin mga Sahabat radiyallaho anhom ajmaen atawa ha masa sin mga Tabien atawa ha masa sin Tabitabien,in hika jawab taniyo kanila bihadto ra isab wala jimato daing kanila in panglang ha pagsa`bo sin mawlod annabiy,iban bukon in katan parkala amon wala nahinang sin Rasulullah iban Sahabat niya iban Tabien iban Tabi`tabien munkar siya atawa makasud siya pa hukuman haram atawa di manjari hinangon sin Ummat Islam,adapon amura in di manjari hinangon apabila awn dalil nanunjuki ha kaharam niya ampa in hambook pakaradjaan apabila wayroon dalil nanunjuki ha kaharam niya in siya yadto mubah manjari mo siya hinangon iban manjari siya di hinangon wala siya siyalla sin sara`,iban in Qur`an piyaturon siya sin Allahotaala ha supaya magpatarrang ha manusiya sin parkala piyagsulangan nila biya na sin parman namayta وَمَا أَنْزَلْنَا عَلَيْكَ الْكِتَابَ إِلَّا لِتُبَيِّنَ لَهُمُ الَّذِي اخْتَلَفُوا فِيهِ وَهُدًى وَرَحْمَةً لِقَوْمٍ يُؤْمِنُونَ iban wala namo piyaturon in Qur`an kaymo buat malaingkan supaya mo hika patarrang kanila in piyagsulangan nila ha agama sarta hidayat iban rahmat pa kawman sin mga namaratsaya,biya na sin piyatarrang taniyo in asalan sin panglaggo iban pagpusba ha Rasulullah sallallaho alayhi wa sallam amuna in parman sin Allahotaala أَلَمْ يَجِدْكَ يَتِيمًا فَآَوَى bukon ka kiyasakupan kaw ya Mohammad sin Tuhan mo yatim piyanjarihan niya kaw nagpusba kaymo,in pagsa`bo ha mawlod annabiy hambook tibayhuan sin paglaggo iban pagparihala sin Ummat Islam ha Nabi nila mulliya sallallaho alayhi wa sallam

Hikmat Sin Pagsa`bo ha Mawlod Annabiy

Di hikalibon pa tiyap-tiyap nagsa`bo sin mawlod in katan sin panulang ha pakaradjaan natibook kaniya in kamatauran sin Ummat Islam daing sila ha mga mangliliyo lakad ha agama biya na sin piyatarrang sin sunnat sin Rasululllah sallallaho alayhi wa sallam ampa in pagsulang ha piyagtibookan sin Ummat Islam in asalan niya daing ha mga Munafiqen amon ha masa sin Rasulullah sarta timubo daing kanila in mga Khawarij ha masa sin mga Sahabat iban Tabien,in mga Khawarij daing ha suling saingsing sin mga Munafiqen sarta maglahil sila ha tiyap-tiyap wakto iban masa sumagawa piyapanjarihan sila sin Allahotaala amon umatubang kanila iban mamugtue ha parsugpatan nila labay daing ha bukti iban tanda matarrang,daing ha mga miyungkil nila pakaradjaan natibook kaniya in Ummat Islam in pagsa`bo ha pagtumtom sin kapagbata ha Rasulullah iban pagmungkil nila ha dum sin pagmawlod kaniya sarta sin pamung nila in dum ini way karahan iban hi siyo in nagbayta amuna tud ini in dum kapagbata ha Nabi hangkan sila magsa`bo ha dum ini sin jinisan kakahinang,sambil inda jinis na in daawa nila manunjuki ha pagmungkil nila sin pagmawlod,bang sadja ba sila namikilan iban mabaya dumawhat sin hidayat tanto mamarahi na bukti kanila in pagtibook (ejma) sin Ummat Islam ha kaharos sin pagsa`bo ha mawlod annabiy karna in ejma hambook siya dalil langkap ha agama Islam biya na sin kibiyayta sin Allahotaala ha kitab niya iban piyatarrang sin Rasulullah ha sunnat niya

Damikkiyan di hikalibon pa taga akkal sampurna iban taga pangita masawa in pagtipon sin Ummat Islam ha paghadir sin mawlod karna dumungog sin kissa kapagbata ha Rasulullah sallallaho alayhi wa sallam in siya pakaradjaan miyarayaw sin sara` iban sin ka ulamaan dakula sin Ummat Islam iban hinang kiyabiyaksahan siya sin manusiya sampay pa adlaw nato bihawn,in labi mahalga hikmat ha damikkiyan yadto amuna in pagtumtom nila pa Allahotaala Tuhan tunggal naghanoghara kanila sin sa laggo-laggo ne`mat iban rahmat,in pagtipon sin mga sila himadir pa pagmawluran bukon uno bang uno buat malaingkan pangagad nila ha pardaakan sin Allahotaala karna nagdaak siya ha mga eipon niya in manumtom kaniya ampa in pagtumtom sin ne`mat labay daing ha tulos ihilas sin pangatayan mabista siya sukor iban jikir pa Allaho subhanaho wa taala,iban daing ha mga tibayhuan sin pagtumtom kaniya sin Ummat Islam ha pagmawluran in pagsalawat nila pa Rasulullah sallallaho alayhi wa sallam,naraak sila sin Allahotaala magsalawat pa Rasulullah ha diyaranan iban ha uno-uno kahalan nila daing ha awn sabab iban sin wayroon sabab,parman sin Allahotaala إِنَّ اللَّهَ وَمَلَائِكَتَهُ يُصَلُّونَ عَلَى النَّبِيِّ يَا أَيُّهَا الَّذِينَ آمَنُوا صَلُّوا عَلَيْهِ وَسَلِّمُوا تَسْلِيمًا tanto in Allahotaala iban Malaikat niya simalawat sila ha nabi Mohammad ya kamo mga bar`eiman salawat kamo kaniya iban salam kamo kaniya,ampa in nagsalawat pa hadarat sin Rasulullah sallallho alayhi wa sallam tanto nagjikir siya pa Allahotaala

Di hikalibon in Allahotaala siyara` niya pa mga eipon niya in sumukat atawa magduwaa kaniya ha parman niya وَقَالَ رَبُّكُمُ ادْعُونِي أَسْتَجِبْ لَكُمْ iban nagparman in Tuhan niyo pagduwaa kamo kako sambagon ko kaniyo,sarta nagsabda in Rasulullah ما أذن لعبد في الداء حتي أذن له في الاجابة wala nag-ijin in Tuhan pa eipon ha duwaa sahingga ijinan kaniya ha jawab

Mga Kakahinang Timuko ha Pagsa`bo sin Mawlod Annabiy

Pagbatsa sin Qur`an Mahamulliya amon naraak kitaniyo sin Allahotaala maghapal iban magbatsa kaniya sarta biyulansangan kitaniyo sin Rasulullah ha tungod sin tungbas niya hadarat sin Allahotaala,iban ha pagbatsa sin Qur`an tumuron in hanong iban lumikos in rahmat pa katan nagbatsa kaniya

Pagjikir pa Allahotaala amon naraak kitaniyo sin Allahotaala kaniya ha parman niya فَاذْكُرُونِي أَذْكُرْكُمْ وَاشْكُرُواْ لِي وَلاَ تَكْفُرُونِ tumtuma niyo ako tumtumon ta kamo iban pagsukor kamo kako sarta ayaw kamo magkufor,damikkiyan nagbulansang in Rasulullah ha tutungbasan niya sutsi iban rahmat daing ha Allahotaala

Pagsalawat pa Rasulullah daing ha katan dahan iban tibayhuan nasabbot sin sunna,iban in pagsalawat pa Rasulullah pardaakan sin Allahotaala pa mga eipon niya ha parman niya إنَّ اللَّهَ وَمَلائِكَتَهُ يُصَلُّونَ عَلَى النَّبِيِّ يَا أَيُّهَا الَّذِينَ آمَنُوا صَلُّوا عَلَيْهِ وَسَلِّمُوا تَسْلِيماً tanto in Allahotaala iban Malaikat niya simalawat sila ha nabi Mohammad ya kamo mga bar`eiman salawat kamo kaniya iban salam kamo kaniya,iban tungbasan niya in mga nagsalawat pa Rasulullah sin pahala dakula,nagsabda in Rasulullah من صلى علي مرة صلى الله علي فيها عشرة hi siyo in nagsalawat kako nakaminsan salawatan siya sin Allahotaala ha ini makahangpo,iban nagsabda siya أنا حبيب الله و المصلي علي حبيبي in ako kalasahan sin Allahotaala iban in nagsalawat kako kalasahan ko,na hi siyo in mabaya mabilang siya daing ha mga jumlaha kalasahan sin Rasululla subay siya magpataud sin salawat niya ha habib Rasulullah

Magpajamo pagkaon iban magsadakka pa mga miskin karna nagdaak in Allahotaala ha pagpusba iban ha pagpakaon kanila amuna in nasakop ha tingbusan sin parman niya nanunjuki pa sipat sin mga eipon niya hi tilakbo pa lawm sin narka jahannam ha adlaw mahuli إِنَّهُ كَانَ لا يُؤْمِنُ بِاللَّهِ الْعَظِيم وَلا يَحُضُّ عَلَى طَعَامِ الْمِسْكِين tanto in kiya awnan niya (eipon) wayroon siya namaratsaya ha Mahatinggi Allah iban wayroon siya namulansang ha magpakaon pa mga miskin

Mga Dalil sin mga Ulama ha Pagjari Nila sin Pagsa`bo ha Mawlod Annabiy

Biya sin sambat di hikalibon ha taga akkal sampurna iban taga pangita masawa in pagsa`bo sin Ummat Islam ha kapagbata sin Nabi Mohammad sallallaho alayhi wa sallam in siya pakaradjaan subay hinangon sin mga ummat niya bilang pagsukor nila ha ne`mat iban rahmat sa laggo-laggo piyaratung kanila sin Allahotaala,sarta in pagsukor ha ne`mat mabilang siya jikir pa Allahotaala iban in Allahotaala nagdaak kato taniyo magjikir kaniya ha parman niya فَاذْكُرُونِي أَذْكُرْكُمْ وَاشْكُرُواْ لِي وَلاَ تَكْفُرُونِ tumtuma niyo ako tumtumon ta kamo iban pagsukor kamo kako sarta ayaw kamo magkufor

Daing ha mga tindugan mahugot sin Ummat Islam ha pagsa`bo nila sin mawlod annabiy amuna in pangagad nila ha pardaakan sin Allahotaala ha parman niyaواعْتَصِمُوا بِحَبْلِ اللَّهِ جَمِيعًا وَلا تَفَرَّقُوا وَاذْكُرُوا نِعْمَةَ اللَّهِ عَلَيْكُمْ إِذْ كُنْتُمْ أَعْدَاءً فَأَلَّفَ بَيْنَ قُلُوبِكُمْ فَأَصْبَحْتُمْ بِنِعْمَتِهِ إِخْوَانًا وَكُنْتُمْ عَلَى شَفَا حُفْرَةٍ مِنَ النَّارِ فَأَنْقَذَكُمْ مِنْهَا كَذَلِكَ يُبَيِّنُ اللَّهُ لَكُمْ آيَاتِهِ لَعَلَّكُمْ تَهْتَدُونَ iban panggayunggong kamo ha lubid sin Allahotaala sarta ayaw kamo magmuparik iban tumtuma niyo in ne`mat sin Allahotaala kaniyo ha tatkala in kiya awnan niyo magbanta siyugpat niya in antaraan sin pangatayan niyo sampay nabilang kamo daing ha sabab sin ne`mat niya magtaymanghod iban in kiya awnan niyo ha higad lungag daing ha narka jahannam liyappas kamo sin Allahotaala daing didto damikkiyan yadto patarrangon kaniyo sin Allahotaala in mga tanda niya muramurahan kahidayatan kamo

Damikkiyan in pagtibook (ejma) sin Ummat Islam ha pagsa`bo sin kapagbata kaniya daing ha tahon pa tahon ampa in ummat ini hipusan na sin Rasulullah sallallaho alayhi wa sallam sin di magtibook ha kalaungan biya na sin kiyabaya niya لا تجتمع أمتي على الضلالة di magtibook in ummat ko ha kalaungan,adapon in pagmungkil ha pagsa`bo sin mawlod annabiy wala nasabbot buat malaingkan daing ha mga sila gimuwa ha kiypagtibookan sin Ummat Islam mga sila nagmuparik ha jamaa iban nangliyo lakad ha agama

Ha tatkala timarrang na in wakto sin kapagbata ha Nabi Mohammad sallallaho alayhi wa sallam daing ha mga dum nakabidda ha kaibanan diyuman iban in adlaw niya amon silakan sin suga daing ha mga adlaw nakabidda ha kaibanan iyadlawan na in pagmawlod kaniya mabilang haylaya daing ha mga haylaya sin Ummat Islam iban musim daing ha mga musim hi pagpa^tampal sin kakuyagan,nagbayta in Imam Ibn Ayyad ha kitab niya Shamael: adapon in pagmawlod timampal kako haylaya siya daing ha mga haylaya sin Muslimen iban musim daing ha mga musim nila sarta in katan hinang ha lawman niya manunjuki siya pa kakuyagan iban kakugan ha mawlod mubarak, iban nagbayta in Imam Al-Qastalaniy ha kitab niya mawahib alladonniya: nagpatagainop in Abu Lahab puas sin kamatay kaniya na asubo siya ha kahalan niya in agi niya ha lawm sin narka buat malaingkan gaanan in ajab ko ha tiyap-tiyap dum isnin karna sadja sin paglimaya niya kan Tsuwayba eipon niya ha tatkala siya kiyabaytaan hi Tsuwayba sin kapagbata ha anakon niya amuna in Nabi Mohammad sallallaho alayhi wa sallam,iban nagbayta in Imam Ibn Al-Jazariy: bang in kiya awnan hi Abu Lahab hambook kafir amon timuron in Qur`an ha pangdusdos kaniya dihilan siya tungbas marayaw ha lawm sin narka ha karna sin kimuyag siya ha kapagbata sin Rasulullah sallallaho alayhi wa sallam biyadien na in hal sin muslim nanawhid pa Allahotaala daing ha ummat niya alayhi assalam amon nagtuyo sin katan parsugpatan niya pa Rasulullah iban sin katan pargausan niya ha paglasa pa Rasulullah sallallaho alayhi wa sallam tanto in kiya awnan sin pahala niya hadarat sin Allahotaala in pasuron siya pa lawm surga,mataud pa in mga kabtangan sin Ulama dakula manunjuki ha pagjari nila sin pagsa`bo ha mawlod annabiy muramurahan karihilan taniyo wakto ha kaibanan pangadjian

Mas`ala Mahalga

Lawng sin mga sila nagmungkil ha pagsa`bo sin mawlod annabiy,in pagsa`bo sin hinang mawlod maglamugay kaniya in kausugan iban kababaihan awn kaibanan kanila taga junub iban biyubulan magsud pa lawm sin masjid iban sin kaibanan daawa nila,in hipamung nato kanila hangkan in mga manusiya nakahinang sin bihadto tanda sin kulang in panghati nila ha agama, mahuli bang in tao way panghati ha agama sakali nakahinang siya sin langgal sara` ha wala niya kiya ingatan kompas niyo hisabon baha siya sin sara`? in mapatot subay sila bukon pag-amalan iban subay bukon lagi lagion sumagawa hinduan ha supaya di sila makahinang sin bihadto pakaradjaan, sagawa in mga bihaini daawa nila sadja daing ha katigidlum sin pangita nila iban kabuta sin pangatayan nila,huon nasa kabakan taniyo in pag-iyanon nila yadto ha pagmawluran adapon hangkatiyo da siya bang ta hi timbang pa karayawan ha pagmawluran amon nakalando in taud niya, ha sabab yan wayroon nagsalla` ha pagmawlod buat malaingkan in mga sila mangdihil sadja sakna iban ngi pa Ummat Islam,iban di nila kaingatan in timindog dalil ha sara` sin in najis hangkatiyo di niya kanajisan in tubig mataud, bang sadja bandingon marayaw sin mga panulang ha pagmawlod in hinang mangi iban hinang marayaw amon jimato ha pagmawluran tanto kabatukan nila in hinang marayaw lando in taud niya iban in hinang mangi lando in salat niya iban di mahinang sabab hi pangdihil nila sakna iban ngi pa Ummat Islam magmamawlod gam mayan bang awn kiyakitaan nila mangi langon nila ha supaya dumayaw bukon hi pangdihil nila sakna pa Ummat Islam in kakitaan nila maniyo-tiyo kalaungan sin kabanan kulang in panghati ha agama

Lawng sin mga sila nagmungkil ha pagsa`bo sin mawlod annabiy,in pagsa`bo sin mawlod hinang paningod singod ha paghinangon sin kristiyan amuna in pagkrismas nila kan Nabi Eisa alayhi assallam,nagbayta in Imam Ibno Hajar Al-Asqalaniy jawab niya ha sual tungod pagmawlod timampal kako in pagharos ha mawlod daing ha asalan mahugot amuna in nasabbot ha kitab sahihain (sahi bukhariy iban sahi muslim) in Nabi Mohammad sallallaho alayhi wa sallam ha tatkala dimatong pa Madina kiyasakupan niya in mga Yahudi nagpupuasa sila ha adlaw ashura (hangpo kasubangan sin bulan muharram) iyasubo sila sin Nabi Mohammad in jawab nila: ha adlaw ini liyu`mos sin Allahotaala in Fir`awn iban piyarihala niya in Musa in kami nagpuasa karna pagsukor in agi sin Rasulullah labi in awla namo kan Musa daing kaniyo sarta nagdaak in Rasulullah magpuasa ha adlaw ini,bang lawng nila in pagmawlod sin Umat Islam amon bilang pagsukor pa Allahotaala iban panglaggo pa Rasulullah paningod singod ha kristiyan biyadiin na in Rasulullah ha hadith nasabbot ini naningod singod da isab siya ha Yahudi? sawkat niya kita` in mga Yahudi nagpupuasa ha adlaw ashura nagpuasa isab siya sarta dimaak nagpuasa ha adlaw ini? in hambook daawa nila amuna in pagpaham nila miyagad ha kabayaan sin akkal nila ha hadith sin Rasulullah لا تطروني كما أطرت النصارى عيسى ابن مريم ayaw niyo palabiha in pagpudji niyo kako biya sin pagpudji sin Nasrani ha Eisa anak hi Maryam,muna-muna matampal in hadith ini bukon manunjuki ha paglang sin pagmawlod iban pagpudji ha Rasulullah sumagawa nanunjuki siya sin manjari magpudji ha Rasulullah ha sarat bang mayan di makaliyo daing ha darajat pagkamanusiya iban pagka-eipon niya sarta di mabiya sin pagpudji sin mga Nasrani ha Eisa alayhi assalam iban matampal kato taniyo katan in pagpudji sin mga Nasrani ha nabi Eisa alayhi assalam bilang nila Tuhan atawa anak sin Tuhan in Nabi Eisa alayhi asallam danan sila nakapagsirik pa Allaho subhanaho wa taala

Mahuli puas sin lilayan masawa iban bukti matarrang timampal kato taniyo in pagmawlod jiyari siya sin sara` iban in siya dimagbos pagsukor pa Allahotaala iban pagpudji pa Rasulullah sallallaho alayhi wa sallam iban mabilang siya sook daing ha mga hikasook sin eipon pa Allaho subhanaho wa taala,in subay nato hinangon bang kitaniyo magsa`bo sin mawlod annaby hi layo nato daing kaniya in hinang munkar iban paglamugay sin kausagan iban kababaihan labi ra isab marayaw bang kitaniyo makakawa tampat mapuas daing sin lawm masjid ha supaya di na jumato in pagsud guwa pa masjid sin mga sila taga junub iban biyubulan,in pagsa`bo sin mawlod tanda sin kug iban kuyag sin Ummat Islam ha ne`mat iban rahmat dirihilan kanila sin Allaho subhanaho wa taala

Please follow and like us:

Comments

comments

Pag SHARE kaw bat sumampay pa kaibanan. Magsukul!