Hikapag-Dalil Bahah ha Shara’ in Kabtangan “Wayruun Nahinang Sin Rasul (SAW)

10885573_830063350369401_6097235490072615216_n

By Baghinda Ali

Asal in tabi’at sin mga ahlul bid’ah wal hawa’, in shara’ sin pag-agama nila, patinggilun nila sadja ha analysis sin akkal nila. Makabassa hambuuk pa duwa pa tuw hadith, amu na in hisakat pa ta’as palalihan ha mga Islamic Symposium iban hipanghukum ha mga kakahinang amu in ubus na hiyalulay sin mga ulama’ dain sin tikmil masa in hukuman niya… biyah na sin pagmawlud, sawpama niya.

Mataud mga kaguruhan, especially dain ha mga madrasa biyah sin Islamic Library iban Markazul Ijtihad bang di ha Lupah Sug, atawa Ma’had Moro bang ha Lupah Zamboanga, in matawakkal mama’tali ha hukuman kajari sin pagmawlud, ha reason bahasa wayruun kunuh nahinang sin Rasul (saw)… wayruun nahinang sin mga sahabat (rad)… wayruun nahinang sin upat imam… wayruun nahinang sin mga salaful ummah…
Taymaun bahah sin shara’ sin mga reasons biyah sin nasabbut yaun?

Magbalik kitaniyu pa pamanduh sin Qur’an iban Sunnah, iban pandapat sin mga ulama’ sin Islam.

Muna-muna, subay natuh pandangun in masa’alah ini dain ha guwah sin duwa pihak ini: pihak sin mga nanglang, iban pihak sin mga liyang. Ha bihaini, kajawaban natuh marayaw in pangasubu nasabbut natuh hainduun ha wayruun pagtabang-dapit, sartah hibalik natuh pa Qur’an iban hadith, iban na sin pahamam iban pikilan sin mga sahabah (ra) iban na sin mga ulama’.

Ha dih natuh pa jawaban in masa’alah ini, subay natuh dih kalupahan sin in piyagbissarahan natuh ini amu na in mga aturan sadja sin pag-ibadat, bukun ibadat.

Hambuuk dain ha mga ibadat amu in hinduh katuh sin Allah (swt) ha laum sin Qur’an Mahamulliya amu na in pagpanawag-tawag pa pag-iman. Biyah na sin nasabbut Niya ha farman Niya, Surah Ali Imran ayat 193:

رَبَّنَا إِنَّنَا سـَمِعْنَا مُنَادِيًا يُنَادِي لِلْإِيـمَانِ أَنْ آمِنُوا بِرَبِّكُمْ فَآمَنَّا

{Ya Tuhan namuh! Sabunnal tuud diyungug namuh na in mananawag-tawag nanawag-tawag pa pag-iman, “Pag-iman kamu pa Tuhan niyu!.” Mahuli ampa kami nag-iman.}

Matarrang na sin in pagpanaabbit pa pag-iman in yan hambuuk dain ha mga daakan katuh sin Allah (swt). Sartah in suntuan natuh ha hal yan amu in mga Nabi (as). Nasabbut sin Allah (swt) ha Surah Nuh ayat 5 bang biyariin in pagpanawag-tawag hi Nabi Nuh (as) ha kawman niya pa pag-iman:

إِنِّي دَعَوْتُ قَوْمِي لَيْلًا وَنَهَارًا

{Sabunnal tuud tiyaabbit ku in mga tao ha kawman ku (pa pag-iman) dum iban adlaw.}

Nah bihaun, yari isab in aturan sin hambuuk sahabah mulliya amu na in Abdullah bin Rawahah (ra) ha tungud sin pagpanawag-tawag pa pag-iman:

كَانَ عَبْدُ اللهِ بْنُ رَوَاحَةَ رضي الله عنه إِذَا لَقِيَ الرَّجُلَ مِنْ أَصْحَابِهِ ، يَقُولُ : تَعَالَ نُؤْمِنْ بِرَبِّنَا سَاعَةً ، فَقَالَ ذَاتَ يَوْمٍ لِرَجُلٍ ، فَغَضِبَ الرَّجُلُ ، فَجَاءَ إِلَى النَّبِيِّ صلى الله عليه وسلم ، فَقَالَ : يَا رَسُولَ اللهِ ! ، أَلاَ تَرَى إِلَى ابْنِ رَوَاحَةَ يُرَغِّبُ عَنْ إِيمَانِكَ إِلَى إِيمَانِ سَاعَةٍ ؟ فَقَالَ النَّبِيُّ صلى الله عليه وسلم : يَرْحَمُ اللَّهُ ابْنَ رَوَاحَةَ ، إِنَّهُ يُحِبُّ الْمَجَالِسَ الَّتِي تَتَبَاهَى بِهَا الْمَلاَئِكَةُ. (رواه أحمد بإسناد جيد)

{Bang magbak hi Abdullah bin Rawahah (ra) iban sin mga kaibanan sahabah sin Nabi (saw), mag-iyan siya, “Kari kaw, mag-iman kita hangkaraih.” Hambuuk adlaw, awun hambuuk tao na-iyan niya bihayan sahingga iyastulan in tao yadtu ampa miyadtu namaytah pa Rasul (saw), “Ya Rasulullah! Maraih wayruun mu kiyasakupan hi Ibnu Rawahah, timaykud na dain ha pag-iman kaymu pa pag-man hangkasasa’at?” Sabda sin Nabi (saw), “Mura-murahan bang mayan kiyaulungan sin Allah (swt) hi Ibnu Rawahah! Matagi tuud siya ha mga majlis amu in hipagbabansag sin mga malaikat. (Ahmad)}

Ha hadith nasabbut natuh ini, awun aturan hinang hi Abdullah bin Rawahah (ra) ha tungud sin pagpanaabbit pa pag-iman, amu in wayruun kiyaingatan sin mga sahabah dugaing sartah bukun biyah sin aturan sin mga Nabi (as) ha laum sin Qur’an. Liyang bahah sin Rasul (saw) in hinang hi Abdullah bin Rawahah (ra) ini?

Awun hambuuk riwayat hi Abu Sa’eed Al Khudri (ra):

أَنَّ رَجُلاً سَـمِعَ رَجُلاً يَقْرَأُ ﴿قُلْ هُوَ اللَّهُ أَحَدٌ﴾ يُرَدِّدُهَا فَلَمَّا أَصْبَحَ جَاءَ إِلَى رَسُولِ اللهِ صلى الله عليه وسلم فَذَكَرَ ذَلِكَ لَهُ وَكَأَنَّ الرَّجُلَ يَتَقَالـُّهَا ، فَقَالَ رَسُولُ اللهِ صلى الله عليه وسلم: وَ الَّذِي نَفْسِي بِيَدِهِ! إِنَّهَا لَتَعْدِلُ ثُلُثَ الْقُرْءآن. (رواه البخارى)

{Sabunnal tuud awun hambuuk tao nakarungug tao nagbabassa sin Surah Qul Huwallahu Ahad pagbalik-balikan. Pagmaynaat mayan, miyadtu in tao yadtu pa Rasul (saw) ampa niya yadtu piyangaru, biyah saula-ula tiyuh-tiyuh para kaniya in ammal sin tao diyungug niya yadtu. Sambag sin Rasul (saw), “Sapahan ku ha Dzat amu in tag-amulahi sin ginhawa ku, in Surah yan timbang sin tungka-bahagih (2/3) sin Qur’an.” (Bukhari)}

Laung hi Imam Ibnu Hajar Al Asqalani (rah) ha kitab niya Fat’hul Bari ha tungud sin hadith ini, “In nagbassa ha hadith ini hi Qatadah bin Nu’man (ra). Riwayat ini hi Imam Ahmad labay dain ha sanad hi Ibnu Haitham sin in agi hi Abu Sa’eed Al Khudri (ra), ‘Hangkarum hi Qatadah bin Nu’man nagbassa sin Qul Huwallahu Ahad ha wayruun niya na diyugangan in biyassa niya.’ In tao nakarungug kaniya maraih hi Abu Sa’eed Al Khudri (ra), taymanghud niya ha inah, iban nagdaraig in bay nila. Bihayan in pamaham hi Ibnu Abdil Barr (rah). Riwayat da isab hi Daruqutni (rah) labay dain ha sanad hi Ishaq bin Tabba’ dain kan Imam Malik (rah) in hadith ‘Awun hambuuk pangdaig ku amu in magsambahayang sadja tungah dum, iban wayruun ayat pagbassahun niya ha sambahayang niya dugaing dain ha Surah Qul Huwallahu Ahad.” Laung hi Qadhi Abdullah Mahfudz Al Haddad (rah), “In mga riwayat ini manunjuki sin in pagbassa hi Qatadah bin Nu’man (ra) sin Qul Huwallahu Ahad pagbalik-balikan, paghinangun niya ha laum sambahayang niya tungah dum.”

Ha hadith ini, awun aturan hinang hi Qatadah bin Nu’man (ra) ha tungud sin pagbassa ayat Qur’an ha laum sambahayang tahadjud amu in wayruun kiyaingatan hi Abu Sa’eed Al Khudri (ra) sartah wayruun kiyasakupan sin mga sahabat ha kakahinang sin Rasul (saw). Ha waktu kiyaingatan na sin Rasul (saw) in aturan hi Qatadah bin Nu’man ini, unu bahah, liyang siya sin Rasul (saw)?

Mataud pa mga riwayat dain ha mga sahabah (ra) sin naghinang sila sin mga kakahinang amu in wayruun nahinang sin Rasul (saw). Ha laum kitab As-Sunnah wal Bid’ah hi Qadhi Abdullah Mahfudz Al Haddad (rah), awun 71 riwayat saheeh amu in manunjuki pa mga kakahinang sin mga sahabah (ra) amu in wayruun nahinang sin Rasul (saw) atawa wayruun niya kiyapangdaak. Piyaghinang nila in mga kakahinang ini sibuh da ha waktu buhih pa in Rasul (saw) atawa puas na sin kataykud niya dain ha dunya ini.

Amu sadja in dih hipahinang katuh sin Allah (swt) amu in liyangan sin Rasul (saw). Arapun in parkalah wayruun nahinang sin Rasul (saw), wayruun da isab naglang katuh in Allah dain ha hinang yan, biyah sin farman Niya ha Surah Hashar ayat 7:

وَ مَا آتَاكُمُ الرَّسُولُ فَخُذُوهُ وَ مَا نَهَاكُمْ عَنْهُ فَانْتَهُوا

{In mga parkalah diyaak kaniyu sin Rasul (saw) hinanga niyu, iban in mga parkalah liyang niya kaniyu nah layui niyu.}

Sahingga laung sin kaibanan mga fuqaha:

الترك ليس بحجّة فى شرعنا # لا يقتضي منعا و لا إيجابا
فمن ابتغى حظرًا لترك نبيّنا # و رءآه حكما صادقا و صوابا
قد ضلّ عن نهج الأدلّة كلّها # بل أخطأ الحكم الصحيح و خابا

{In pagtinggal bukun dalil ha shara’ natuh… Bukun in maksud niya dih makadjari atawa harus… Hisiyu-hisiyu in nagkahandak sin pagtinggal sin Nabi natuh bilang pangalangi… Sartah niyat niya hambuuk hukuman kimugdan iban bunnal… Nah sabunnal tuud nalaung na siya dain ha tiranan sin katan mga dalil… Gam mayan nasallah na siya dain ha hukuman saheeh sartah nalugih na siya…}

In kahaupuan niya, bang in hambuuk aturan sin pag-ibadat wayruun da simulang ha Qur’an iban hadith, dih yan makadjari langun. Gam mayan, in mga kakahinang biyah sin liyalang sin kaibanan mga taymanghud natuh – biyah na sin mga pagmawlud, pagzikir iban pagduwa’a barjama’ah puas sambahayang fardhu’, pagpapajamu ha mga tao para ha mayat ha adlaw hikapitu dain ha kamatay kaniya, pagbassa Qur’an ha daig kubur, iban sin mga dugaing pa – amu in iyan nila wayruun kunuh nahinang sin Rasul (saw), bang talitiun marayaw, awun da isab kabakan mga dalil dain ha Qur’an iban hadith amu in manunjuki sin in mga kakahinang ini nakasud da isab pa lingkupan sin daakan sin Allah (swt) iban pamulansang sin Rasul (saw).

Allahu a’lam bissawab.

Please follow and like us:

Comments

comments

Pag SHARE kaw bat sumampay pa kaibanan. Magsukul!